Moččummus rosttovlaulli čueʹjje še kooum sääʹmǩiõʹlle pirr Lääʹddjânnam. Šõddmõõžž taʹrjjee vueiʹttemvuõđ rääuhtõõvvâd rosttov saaǥǥ peällsa da läullad toobdâs rosttovlaullʼjid tâʹvv-, aanar- da nuõrttsääʹmǩiõʹlle. Säʹmmlai dommvuuʹd lââʹssen šõddmõõžžid riâžžât pirr Lääʹddjânnam. Määŋgin šõddmõõžžin taʹrjjeet še rosttovsääʹpp da vueiʹttemvuõđ kaaunõõttmõʹšše da saǥstõõllmõʹšše.

Šõddmõõžžid riâžžât täin päiʹǩǩ-kooʹddin:
• Ne 27.11. čiâss 19 – Turku, Duõmmceerkav
• Pi 28.11. čiâss 18 – Tampere, Aleksanterin kirkko
• Su 29.11. čiâss 14 – Heʹlssen, Duõmmceerkav
• Pâ 30.11. čiâss 15 – Oulu, Karjasillan kirkko
• Vu 8.12. čiâss 18 – Ruäʹvnjargg, Ruäʹvnjaarǥ ceerkav
• Su 13.12. čiâss 18 – Jyväskylä, Keltinmäen kirkko

Obbvuõđ vueʹssen valmštââvv še Ruäʹvnjaarǥ seäʹbrrkååʹdd puuʹtʼtem videotuejjõs, koon fiʹlmmjet Suäʹđjel ceerkvest. Videost kuulât rosttovlaullʼjid kooum sääʹmǩiõʹlle. Videost õlmstââʹttet ouddfiiʹlme 10.10. da jiõčč video õlmstââʹttet 31.10.

Õutstõõzz viõkk rosttov saaǥǥ peällsest

Ruäʹvnjaarǥ pââimõspapp Ilari Kinnunen kovvad määʹtǩes sääʹmvuõđ peällsa nääiʹt: "Säʹmmlai da ceerkav suåvâdvuõttproseʹss lij pohttam ouʹdde õhttsaž historia da tõn vaiʹǧǧes pieʹlid. Lij vääžnai, što sääʹn da tuâj vuäiʹtte pueʹttiääiʹj mušttled ciistâst âânnmõõžžâst da rääʹǩǩesvuõđâst. Isõõzz šõddma õhttneei aʹŋǧǧli saakk suäpp tän-aa vuâkka: 'Vuâsppååʹd lij cistt õllʼjõõzzin, määdd âʹlnn rääuh oummuin, koid son rääʹǩǩast.' (Luuk. 2:14)"

Šõddmõʹšše, koon riâžžât Turkust, vuässõõtti Ainu Feodoroff mušttal, mõʹnt šõddmõš lij suʹnne vääžnai:”Leäm jälstam ǩeeʹjjmieʹldd jieʹllem meädda Sääʹmest, mõõn diõtt lij vääžnai da miârktõõzzlaž, što eeʹjjest lij ni tõt õhtt peiʹvv, kuäʹss vuäitt raakktõõttâd sääʹmpihttsivuiʹm da prääzkjed tõn kulttuur jeeʹres säʹmmlaivuiʹm.

Nuuʹbb puõlvvõõǥǥ ǩiõl mõõnteeʹjen nuõrttsääʹmǩiõl mååust pohttmõš jiijjan aʹrǧǧe da pirrõʹsse lij leämmaž väʹǯǯel, leâša še pääʹlǩ uʹvddi. Moččummus rosttovlaullʼji vääras piâzzam mättõõllâd siõm evaŋǧeʹliumkooska nuõrttsääʹmǩiõʹlle, da muu miõlâst lij fiinâs, što mij siõm ǩiõl vääʹldet lokku tän šõddmõõžžâst. Tõʹst šâdd nåkam toobd, što pukin vaʹǯǯtõõzzin huõlǩani leäʹp veâl tääiʹben.”

Čuovgga urbi – Čuõv äʹmmel: Laaul tuäivast da õhttvuõđâst

Tâʹvvsääʹmǩiõllsaž rosttovlaulli, Čuovgga urbi – Čuõv äʹmmel, õlmstââʹttet skamm-mannust 2025 vuõiggnobstemkääzzkõõzzin da Youtubest. Laaul kuäivv teeʹmes tuäivast da čuõvâst, kook kueʹdde oummu še vaiʹǧǧes aaiʹji. Tuejjõs lij ääiʹjben leämmaž mieʹldd sääʹmǩiõllsaž Moččummus Rosttovlaulli -viihkâst, da ååʹn tõn liântteet vuõss vuâra.

Laaul õhttad modeʹrnn musiikklaž suåvtõõzz da äʹrbbvuõđlaž juõiǥ raajeeʹl kuõskteei da viõǥǥlaž obbvuõđ. Laaul lij sääʹntam Inger-Mari Aikio da suõmmääm Ánnámáret. Solisttân kuulât Aanar ååraž Káren Maria Näkkäläjärvi da Ánnámáret lij še mieʹldd juõiggmen. Puuʹtʼtõõzzâst vaʹsttad jiõnnčeäppõsneǩ da musiikkâr Miro Mantere da suåvtõõzzâst vaʹsttad suu lââʹssen še musiikkâr Otto Eskelinen.

Čuovgga urbi õlmstââʹttet pukin toobdâs vuõiggnobstemkääzzkõõzzin di Oulu aaʹrhelkååʹdd YouTube-kanaalâst. Oulu aaʹrhelkåʹddfondd da Sääʹmteeʹǧǧ Sääʹm-musikk-kõõskõs lie tuärjjääm videâsttmõõžž tuejjummuž.

Õhttsažtuâjast Vuõlttõs-sieʹbrin

Moččummus Rosttovlaulli -šõddmõõžž lie vueʹssen Lääʹddjânnam Vuõlttõs-sieʹbr kampanjast, mâʹst tuärjjeet päärnaid da sij piârrjid maaiʹlmest. Lääʹddjânnam Vuõlttõs-seäʹbrr lij õlmstâttam Moččummus rosttovlaulli -viihk kooum sääʹmǩiõʹlle eeʹjj 2022.

Lââʹssteâđ:
Oulu, sääʹmtuâj piisar Erva Niittyvuopio, +358 40 769 0044, erva.niittyvuopio@evl.fi
Heʹlssen, aaʹrhelkåʹddpiisar Hanna Remes, +358 40 593 1148, hanna.remes@evl.fi
Jyväskylä, Tiia Saatio, + 358 44 365 2677, saatiotiia@gmail.com
Tampere, rekisterpiisar Maarit Vuolab, +358 50 344 2349, maarit.vuolab@evl.fi
Turku, aaʹrhelkåʹddpiisar Timo Helenius, +358 40 6881 492, timo.helenius@evl.fi
Ruäʹvnjargg, saaǥǥtemjååʹđteei Noora Hietanen, +358 40 670 0277 noora.hietanen@evl.fi Vääraihaʹŋǩǩummuž jååʹđteei Hanna Kalanne, +358 40 687 1013, hanna.kalanne@felm.org